Lífsgæðavogin

Hlutfall þeirra sem upplifa sig mjög eða frekar örugg á gangi ein í myrkri er 86% á Íslandi sem er frekar hátt í evrópskum samanburði, en samanlagt meðaltal innan Evrópusambandsins er 75%. Mest öryggi upplifa íbúar Noregs en 93% norskra svarenda telja sig mjög eða frekar örugga við þessar aðstæður en það gera hins vegar aðeins 50% íbúa Búlgaríu.

Íslendingar bera meira traust til réttarkerfisins en aðrir Evrópubúar að meðaltali og gefa trausti til kerfisins 5,7 af tíu mögulegum en aðrir Evrópubúar 4,6. Danir bera mest traust til réttarkerfisins með meðaltalið 7,5 en Slóvenar minnst með meðaltalið 2,7.

Ánægja með nánasta umhverfi er 7,5 á Íslandi af tíu mögulegum sem er aðeins yfir meðaltali Evrópusambandsins (7,3). Mest er ánægjan í Austurríki (8,4) en minnst í Búlgaríu (5,2).

Íslendingar gefa að jafnaði ánægju með fjárhag heimilisins einkunnina 6,4 af tíu mögulegum, en það er hærra en meðaltalið innan Evrópusambandsins (6,0) en töluvert lægra en í Danmörku og Svíþjóð þar sem ánægjan með fjárhaginn er hvað mest (7,6). Minnst er ánægjan með fjárhaginn í Búlgaríu þar sem meðaltalið er 3,7.

Íslendingar gefa ánægju með eigið húsnæði að meðaltali 8,1 af tíu mögulegum sem er nokkuð hærra en meðaltalið í Evrópu (7,5). Mest er ánægja með eigið húsnæði í Danmörku, Finnlandi og Sviss (8,4) en minnst í Búlgaríu (6,0).

Starfsánægja fær meðaleinkunnina 8 af tíu mögulegum á Íslandi. Þetta er töluvert hærra en í Evrópusambandinu almennt þar sem meðalstarfsánægja er 7,1. Starfsánægja er eilítið hærri í Danmörku og Finnlandi (8,1) þar sem hún reynist mest, en minnst í Búlgaríu (6,0).

Íslendingar eru nokkuð ánægðir með það hvernig þeir verja tíma sínum og gáfu tímanotkun sinni að meðaltali 7,4 af tíu mögulegum. Meðaltalið innan Evrópusambandsins er 6,7. Mest er ánægja með tímanotkun í Danmörku (7,8) og minnst í Búlgaríu (5,7).

Þegar fólk metur sjálft heilsufar sitt er hátt hlutfall Íslendinga við góða heilsu, 76%, sem er nokkuð hærra en meðaltalið í Evrópu (68%). Best er heilsufar íbúa á Írlandi en 83% telja sig við góða heilsu þar, en það á aðeins við um 45% Litháa.

Ánægja með félagsleg tengsl fékk meðaleinkunnina 8,1 á Íslandi af tíu mögulegum. Þetta er hærra en meðaltalið fyrir Evrópusambandið í heild (7,8) en nokkuð lægra en í Sviss þar sem hún er mest (8,7). Minnst er ánægjan með félagsleg tengsl meðal íbúa Búlgaríu (5,7).

Íslendingar gáfu ánægju með lífið einkunnina 7,9 sem er töluvert hærra en meðaltalið innan Evrópusambandsins (7,1). Lífsánægja er þó meiri í Danmörku, Finnlandi, Svíþjóð og Sviss þar sem meðaltalið er 8. Minnst er lífsánægja í Búlgaríu, 4,8.